ដោយ: គង់ លាងហួរ
អន្តរជាតិ: រដ្ឋាភិបាលអាមេរិក ក្រោមរដ្ឋបាលរបស់លោកប្រធានាធិបតី ចូ បៃដិន បានប្រកាសបោះទុនវិនិយោគសរុបចំនួន១៩៦លានដុល្លារ សម្រាប់ការជួសជុល និងជំនួសបំពង់បង្ហូរឧស្ម័នធម្មជាតិ ដែលមានវ័យចំណាស់នៅទូទាំងរដ្ឋចំនួន២០។
កញ្ចប់ទុនវិនិយោគនេះ ស្ថិតក្រោមច្បាប់ហេដ្ឋារចនាសម្ព័ន្ធ ដែលត្រូវបានចុះហត្ថលេខា ដោយលោកប្រធានាធិបតី ចូ បៃដិន។
ការចំណាយនេះ នឹងផ្តោតលើការដាក់បំពង់បង្ហូរឧស្ម័នថ្មីជំនួសឱ្យបំពង់ចាស់ៗ ដែលងាយនឹងរងការលេចធ្លាយ ឬបង្កជាគ្រោះថ្នាក់ដល់សុវត្ថិភាព ព្រោះកត្តានេះអាចនាំឱ្យតម្លៃថាមពលកើនឡើង និងបង្កផលប៉ះពាល់ដល់បរិស្ថាន។
លោក Pete Buttigieg រដ្ឋមន្ត្រីក្រសួងដឹកជញ្ជូនអាមេរិក បានអះអាងថា បំពង់បង្ហូរឧស្ម័នធម្មជាតិ ដែលមានអាយុកាលចំណាស់ ប្រឈមនឹងការលេចធ្លាយដ៏មានគ្រោះថ្នាក់ ព្រមទាំងជំរុញតម្លៃថាមពល ដល់គ្រួសារនៃប្រជាជនអាមេរិក និងធ្វើឱ្យប៉ះពាល់ដល់បរិស្ថាន។
លោករដ្ឋមន្ត្រីបានគូសបញ្ជាក់ឱ្យដឹង នៅក្នុងសេចក្តីថ្លែងការណ៍របស់ខ្លួនថា នេះជាមូលហេតុ ដែលរដ្ឋបាលរបស់លោកបៃដិន កំពុងផ្តល់ការគាំទ្រផ្នែកមូលនិធិ ដើម្បីជំនួសបំពង់បង្ហូរប្រេងចាស់ៗ។
ចំណែក លោក Ali Zaidi ទីប្រឹក្សាអាកាសធាតុជាតិរបស់សេតវិមានបានលើកឡើងថា “យើងកំពុងសម្រេចបានវឌ្ឍនភាពយ៉ាងល្អប្រសើរ ក្នុងកិច្ចខិតខំប្រឹងប្រែង ដើម្បីកាត់បន្ថយការបំពុលបរិស្ថាន រួមទាំងសារធាតុ ដែលមានជាតិពុលខ្ពស់ដូចជា មេតាន ព្រមទាំងជួយបង្កើតការងាររាប់ពាន់កន្លែង និងកាត់បន្ថយថ្លៃដើមថាមពល សម្រាប់ប្រជាជនអាមេរិក។
ច្បាប់ហេដ្ឋារចនាសម្ព័ន្ធ របស់រដ្ឋបាលលោក ចូ បៃដិន ត្រូវបានអនុម័តឡើង ដើម្បីទ្រទ្រង់ដល់ការចំណាយទុនវិនិយោគដ៏ច្រើនសន្ធឹកសន្ធាប់ របស់រដ្ឋាភិបាលអាមេរិក ដើម្បីជួសជុលផ្លូវ និងស្ពាន ដែលមានសភាពទ្រុឌទ្រោម ព្រមទាំងស្តារសេវាកម្មរថភ្លើង និងពង្រីកការដឹកជញ្ជូនសាធារណៈ នៅទូទាំងប្រទេស។
ក្រៅពីនេះ ច្បាប់ខាងលើក៏រួមមានកម្មវិធី ជួយបណ្តាញអគ្គិសនីជាតិ និងប្រព័ន្ធទឹកប្រើប្រាស់ និងប្រព័ន្ធលូ ខណៈចំណតអាកាសយានដ្ឋាននានា ក៏នឹងត្រូវបានធ្វើឱ្យប្រសើរឡើងផងដែរ។ កញ្ចប់ថវិកានេះ ក៏ត្រូវបានវិភាជន៍សម្រាប់បង្កើតស្ថានីយ៍ បញ្ចូលថ្មអាគុយរថយន្ត ប្រើថាមពលអគ្គិសនី ហើយនឹងទិញរថយន្ត ប្រើថាមពលអគ្គិសនីដឹកសិស្សសាលាផងដែរ៕ប្រភព: Reuters៕
