ដោយ: គង់ លាងហួរ
អន្តរជាតិ: លោក Nga Kor Ming រដ្ឋមន្ត្រីក្រសួងលំនៅដ្ឋាន លើកឡើងថា ប្រទេសម៉ាឡេស៊ី កំពុងបោះជំហានទៅមុខឆ្ពោះទៅក្លាយជា “ខ្លាអាស៊ី” ខណៈប្រទេសនេះ មានគុណសម្បត្ដិពិសេសចំនួន៥ ដើម្បីទាក់ទាញទុនវិនិយោគពីបរទេស។
លោកបន្តថា ស្ថិរភាពនយោបាយរបស់ម៉ាឡេស៊ី ជាចំណុចសំខាន់ ក្នុងការទាក់ទាញការវិនិយោគ។ លោកកត់សម្គាល់ថា រដ្ឋាភិបាលបានផ្តល់ការណែនាំច្បាស់លាស់ តាមរយៈការដាក់ចេញផែនការយុទ្ធសាស្ត្រជាច្រើន រួមទាំងផែនការមេឧស្សាហកម្មថ្មីឆ្នាំ២០៣០ និងផែនទីចង្អុលផ្លូវផ្លាស់ប្តូរ ទៅរកថាមពលថ្មី។
លោកបានអះអាងថា ផែនការមេទាំងនេះ បានផ្តល់លទ្ធផលរួចមកហើយ តាមរយៈការសម្រេចបាន កំណើនសេដ្ឋកិច្ចលើសពីការរំពឹងទុក ក្នុងរយៈពេល២ត្រីមាសចុងក្រោយ និងជំរុញឱ្យស្ថាប័នហិរញ្ញវត្ថុអន្តរជាតិនានា បង្កើនការវាយតម្លៃខ្ពស់លើទីផ្សារម៉ាឡេស៊ី។ ការណ៍នេះធ្វើឱ្យម៉ាឡេស៊ី ក្លាយជាគោលដៅវិនិយោគបរទេសដ៏ទាក់ទាញ។
លើសពីនេះទៀត លោក Nga Kor Ming បានគូសបញ្ជាក់ថា“ ភាពចម្រុះនៃវប្បធម៌ របស់ប្រទេសម៉ាឡេស៊ី បានជួយសម្រួល ដល់ការធ្វើសមាហរណកម្មយ៉ាងងាយស្រួល សម្រាប់ក្រុមអ្នកវិនិយោគបរទេស ជាមួយនឹងរបាំងភាសាតិចតួចបំផុត”។
លោកបានបន្តថា “វត្តមាននៃសាលាអន្តរជាតិ ប្រកបដោយគុណភាពខ្ពស់ ក៏អាចលើកទឹកចិត្តឱ្យអ្នកវិនិយោគ ងាយស្រួល ក្នុងការផ្លាស់ប្តូរទីលំនៅរបស់គ្រួសារ និងកសាងផ្ទះទី២របស់ពួកគេនៅម៉ាឡេស៊ី”។
ទោះជាយ៉ាងណាក្តី លោក Nga បានកត់សម្គាល់ពីសារៈសំខាន់ នៃការការពារសហគ្រាសធុនតូច និងមធ្យមក្នុងស្រុក ស្របពេលមាន លំហូរវិនិយោគផ្ទាល់ពីបរទេស ដោយលោកបន្ថែមថា ក្រុមហ៊ុនបរទេសមិនគួរផ្ទេរឧស្សាហកម្ម មិនចាំបាច់ទៅកាន់ម៉ាឡេស៊ីឡើយ។
លោកបានពន្យល់ថា “នៅពេលដែលក្រុមហ៊ុនចិនបណ្តាក់ទុនវិនិយោគ នៅប្រទេសម៉ាឡេស៊ី ពួកគេគួរតែជួលបុគ្គលិកក្នុងស្រុកចំនួន៥០ភាគរយ និងអនុញ្ញាតឱ្យក្រុមហ៊ុនក្នុងស្រុកកាន់កាប់ភាគហ៊ុន៥០ភាគរយ”។
លោកបានបន្ថែមថា “នេះជារឿងសំខាន់ណាស់។ យើងស្វាគមន៍ ចំពោះការវិនិយោគពីបរទេស ប៉ុន្តែក្រុមហ៊ុនក្នុងស្រុករបស់យើង ក៏ត្រូវតែទទួលបានការការពារ និងទទួលបានអត្ថប្រយោជន៍ ពីការវិនិយោគទាំងនេះ តាមរយៈការច្របាច់រួមបញ្ចូលគ្នាជាយុទ្ធសាស្ត្រ”៕
