ដោយ: គង់ លាងហួរ
អន្តរជាតិ: ក្រុមហ៊ុនរុករក និងផលិតប្រេងសកល Murphy Oil Corporation របស់សហរដ្ឋអាមេរិក គ្រោងនឹងចាប់ផ្តើមខួងអណ្តូងប្រេង នៅក្នុងប្រទេសវៀតណាម ចំនួន២ទីតាំងនៅដំណា ច់ចុងត្រីមាសទី៣ និងត្រីមាសទី៤ ឆ្នាំ២០២៤នេះ ជាបន្តបន្ទាប់គ្នា។
ផែនការខាងលើនេះ ត្រូវបានលើកមកចុះផ្សាយដោយសា រពត៌មានវៀតណាម The Investor តាមរយៈការដកស្រង់សម្ដីរបស់លោក Roger Jenkins នាយកប្រតិបត្តិក្រុមហ៊ុន Murphy Oil Corporation។
លោក Jenkins បានមានប្រសាសន៍ឱ្យដឹងថា ក្រុមហ៊ុនគ្រោងខួងអណ្តូងប្រេងឈ្មោះ “Hai Su Vang” នៅក្នុងប្លុក15-2/17 នៅត្រីមាសទី៣ ឆ្នាំ ២០២៤ និងអណ្តូងប្រេង Lac Da Hong នៅក្នុងប្លុក 15-1/05 នៅត្រីមាសទី៤ ឆ្នាំតែមួយ។ ប្លុកប្រេងទាំង២នេះ មានទីតាំងស្ថិតនៅតំបន់ (Cuu Long ក្នុងឈូងសមុទ្រភាគខាងត្បូងរបស់ប្រទេសវៀតណាម។
ក្រុមហ៊ុនលំដាប់យក្ស Murphy Oil បានធ្វើការប៉ាន់ប្រមា ណថា អណ្តូងប្រេង Hai Su Vang មានធនធានប្រេងចន្លោះពី១៧០លាន ទៅ៤៣០លានបារ៉ែល ខណៈអណ្តូងប្រេង Lac Da Hong មានធនធានប្រេងចន្លោះពី៦៥ ទៅ១៣៥លានបារ៉ែល។
ជាមួយគ្នានេះ លោក Eric Hambly ប្រធានទទួលបន្ទុកផ្នែកប្រតិបត្តិការរបស់ក្រុមហ៊ុន Murphy Oil Corporation បានគូសបញ្ជាក់ឱ្យដឹងថា “អណ្តូងប្រេងទាំង២ខាងលើ នៅក្នុងប្រទេសវៀតណាមមានសក្តានុពល និងអាចក្លាយជាអាជីវកម្មរុករកប្រេងខ្នាតធំ សម្រាប់ក្រុមហ៊ុនរបស់ខ្លួន”។
លើសពីនេះ លោក Jenkins បានបញ្ជាក់បន្ថែមថា ក្រុមហ៊ុន Murphy Oil Corporation ទទួលបាននូវគ្រឿងសម្ភារៈបរិក្ខារសំខាន់ៗ និងកិច្ចសន្យាបំពង់បង្ហូរប្រេង សម្រាប់ការអភិវឌ្ឍន៍តំបន់អណ្តូងប្រេង Lac Da Vang កាលពីត្រីមាសទី២។
គម្រោងមួយនេះរំពឹងថា នឹងអាចសម្រេចបានដំណក់ប្រេងដំបូងបំផុត នៅដំណាច់ចុងឆ្នាំ២០២៦ខាងមុខ៕ ប្រភព: The Investor៕
