ដោយ: គង់ លាងហួរ
អន្តរជាតិ: ឥណ្ឌាគ្រោងបង្កើនការទាក់ទាញ លំហូរវិនិយោគផ្ទាល់ពីបរទេស (FDI) ពីប្រទេសចិន ទោះបីជាទំនាក់ទំនងនយោបាយរវាងប្រទេសជិតខាងទាំង២ មិនសូវមានលក្ខណៈអំណោយផល បន្ទាប់ពីមានការប៉ះទង្គិចគ្នាផ្នែកយោធានៅតាមបណ្ដោយព្រំដែន ក្នុងឆ្នាំ២០២០យ៉ាងណាក្តី។
ក្នុងអំឡុងវេទិកាធ្វើបទបង្ហាញស្ដីពី ការស្ទង់មតិសេដ្ឋកិច្ចប្រចាំឆ្នាំរបស់ឥណ្ឌា លោកស្រី Nirmala Sitharaman រដ្ឋមន្ត្រីក្រសួងហិរញ្ញវត្ថុ បានមានប្រសាសន៍ឱ្យដឹងថា “ឥណ្ឌាកំពុងប្រឈមមុខនឹងជម្រើសចំនួន២ ដើម្បីទទួលបានអត្ថប្រយោជន៍ពីយុទ្ធសាស្រ្ត China Plus One ដោយឥណ្ឌាអាចធ្វើសមាហរណកម្ម ទៅក្នុងខ្សែសង្វាក់ផ្គត់ផ្គង់របស់ចិន ឬទាក់ទាញលំហូរ FDI ពីប្រទេសចិន”។
ស្របពេលឥណ្ឌាជួបប្រទះ បញ្ហាឱនភាពពាណិជ្ជកម្មដ៏ធំជាមួយប្រទេសចិន លោក Sitharaman បានគូសបញ្ជាក់ថា ការបង្កើនការទាក់ទាញលំហូរFDI នឹងជួយជំរុញការនាំចេញផលិតផលរបស់ឥណ្ឌាទៅកាន់សហរដ្ឋអាមេរិក។
ប្រទេសឥណ្ឌាត្រូវការលំហូរ FDI ដើម្បីបង្កើនសមត្ថភាពក្នុងវិស័យផលិតកម្ម ដែលជាគោលដៅ ប្រកបដោយមហិច្ឆិតាមួយរបស់រដ្ឋាភិបាល លោកនាយករដ្ឋមន្ត្រី Narendra Modi។ បច្ចុប្បន្ន វិស័យផលិតកម្មចូលរួមចំណែក១៧% នៃផលទុនជាតិសរុបរបស់ឥណ្ឌា ខណៈរដ្ឋាភិបាលលោក Modi មានផែនការជំរុញឱ្យវិស័យនេះ ចូលរួមចំណែក២៥ភាគរយ នៃទំហំ GDP នៅត្រឹមឆ្នាំ២០២៥ខាងមុខ។
ទំនាក់ទំនងនយោបាយរវាងទីក្រុងប៉េកាំង និងទីក្រុងញូវដែលី បានជួបភាពតានតឹង បន្ទាប់ពីមានការផ្ទុះជម្លោះនៅតាមព្រំដែនក្នុងឆ្នាំ២០២០ ដែលបានសម្លាប់ទាហានឥណ្ឌាចំនួន២០នាក់ និងទាហានចិនចំនួន៤នាក់។
ក្រោយពីផ្ទុះហេតុការណ៍នោះរួចមក រដ្ឋាភិបាលឥណ្ឌា បានដាក់ចេញវិធានការប្រឆាំងនឹងចិនជាច្រើន រួមទាំងការហាមឃាត់កម្មវិធីទូរស័ព្ទចិនជាង៣០០កម្មវិធី ការដំឡើងពន្ធលើក្រុមហ៊ុនចិន និងការរឹតបន្តឹងលើការវិនិយោគ របស់ក្រុមហ៊ុនលក់ចិន។ ជាលទ្ធផល លំហូរវិនិយោគផ្ទាល់ពីចិនចូលទៅកាន់ប្រទេសឥណ្ឌា បានដាំក្បាលចុះយ៉ាងគំហុក។
ទោះជាយ៉ាងណា ក្រុមអ្នកវិភាគវាយតម្លៃថា គោលនយោបាយរបស់ឥណ្ឌា ដើម្បីជំរុញសេដ្ឋកិច្ចក្នុងស្រុក ទាមទារឱ្យមានបច្ចេកវិទ្យាខ្ពស់ និងត្រូវការក្រុមអ្នកជំនាញមកពីប្រទេសចិន ដើម្បីសម្រេចផែនការពង្រីក វិស័យផលិតកម្មរបស់ខ្លួន។ នៅចន្លោះឆ្នាំ ២០២៣ដល់ឆ្នាំ២០២៤នេះ ចិនបានវ៉ាដាច់សហរដ្ឋអាមេរិក ក្លាយជាដៃគូពាណិជ្ជកម្ម កំពូលរបស់ឥណ្ឌា៕ប្រភព: Reuters៕
