ដោយ: គង់ លាងហួរ
អន្តរជាតិ: គ្រួសារលោក Mukesh Ambani បានឈរនៅលើកំពូលតារាង នៃគ្រួសារអ្នកជំនួញដ៏ធំបំផុត នៅប្រទេសឥណ្ឌា។
លោកមានទ្រព្យសម្បត្តិ ក្នុងទឹកប្រាក់ចំនួន២៥,៧៥ទ្រីលានរូពី (ប្រហែល៣០៦,៩២ពាន់លានដុល្លារ) ឬស្មើនឹង១០%នៃផលទុនជាតិសរុបរបស់ឥណ្ឌា (GDP)។នេះបើយោងតាមរបាយការណ៍របស់ទីភ្នាក់ងារHurun India ប្រចាំឆ្នាំ២០២៤។
អាណាចក្រជំនួញរបស់គ្រួសារ មហាសេដ្ឋីមានជាងគេបំផុតទី១នៅតំបន់អាស៊ីរូបនេះ បានប្រភពមកពីក្រុមហ៊ុន Reliance Industries ដែលធ្វើប្រតិបត្តិការជាចម្បង នៅក្នុងវិស័យថាមពល ការលក់រាយ និងទូរគមនាគមន៍។
វិធីសាស្ត្រគណនាទ្រព្យសម្បត្តិរបស់លោក Ambani មិនរាប់បញ្ចូលការវិនិយោគឯកជន និងទ្រព្យសកម្មដែលងាយស្រួលលក់ប្តូរយកប្រាក់ ក្នុងរយៈពេលខ្លី(Liquid asset)នោះទេ។ ទំហំទ្រព្យសម្បត្តិរបស់គ្រួសារ លោក Ambani រួមមាន ការកាន់កាប់ចំណែកភាគហ៊ុន នៅក្នុងក្រុមហ៊ុន Reliance Industries ក្រុមហ៊ុន Jio Platforms និងក្រុមហ៊ុនReliance Retail ជាដើម។
ចំណែក គ្រួសាររបស់លោក Niraj Bajaj ស្ថិតក្នុងលំដាប់ទី២ ដោយមានទ្រព្យសម្បត្ដិសរុប ចំនួន៧,១៣ទ្រីលានរូពី(ប្រហែល៨៤,៩៨ពាន់លានដុល្លារ)។
គ្រួសារនេះគ្រប់គ្រងអាណាចក្រ ក្រុមហ៊ុនរថយន្ត Bajaj Group ដែលមានមូលដ្ឋាននៅទីក្រុង Pune ស្ថិតនៅភាគខាងលិចរដ្ឋ Maharashtra នៃប្រទេសឥណ្ឌា និងត្រូវបានដឹកនាំដោយលោក Niraj Bajaj។
ចំណែក គ្រួសារលោក Kumar Mangalam birla ជាប់ចំណាត់ថ្នាក់ទី៣ ដោយមានទ្រព្យសម្បត្តិ សរុបចំនួន៥,៣៩ទ្រីលានរូពី(ប្រហែល៦៤,២៤ពាន់លានដុល្លារ)។ គ្រួសារនេះគ្រប់គ្រងអាណាចក្រ ក្រុមហ៊ុន Aditya Birla Group ដែលផ្តោតជាចម្បងលើអាជីវកម្មលោហធាតុ ការជីកយករ៉ែ ស៊ីម៉ងត៍ និងសេវាកម្មហិរញ្ញវត្ថុ។
របាយការណ៍ខាងលើបានគូសបញ្ជាក់ថា អាជីវកម្មរបស់គ្រួសារកំពូល មហាសេដ្ឋីទាំង៣រូប មានទំហំទឹកប្រាក់សរុបចំនួន៤៦០ពាន់លានដុល្លារអាមេរិក ឬស្មើនឹងនឹងទំហំផលទុនជាតិសរុប (GDP) របស់ប្រទេសសិង្ហបុរី។
លោក Anas Rahman Junaid ស្ថាបនិក និងជាប្រធានអ្នកស្រាវជ្រាវនៅក្រុមហ៊ុន Hurun India បានលើកឡើងថា “ការធ្វើពិពិធកម្មឧស្សាហកម្មដ៏សំខាន់ លើអាជីវកម្មរបស់គ្រួសារមហាសេដ្ឋីទាំងនេះ បង្ហាញពីតួនាទីសំខាន់របស់ពួកគេ ក្នុងការរក្សា និងជំរុញស្ថិរភាព នៃកំណើនសេដ្ឋកិច្ចរយៈពេលវែង នៅក្នុងប្រទេសឥណ្ឌា”៕ប្រភព: Business Standard៕
