ដោយៈ ម៉ាលីនណា
ភ្នំពេញៈ លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានអនុញ្ញាតឱ្យលោក Dorji Phuntsho នាយកប្រតិបត្តិ ផ្សារមូលបត្រប៊ូតង់ (RSEB)ចូលជួបពិភាក្សា និងសុំការផ្លាស់ប្តូរបទពិសោធន៍។
ក្នុងជំនួបនេះ លោក Dorji Phuntsho បានលើកឡើងពីគោលបំណង ក្នុងការសិក្សាស្វែងយល់ អំពីដំណើរការអភិវឌ្ឍន៍ប្រព័ន្ធទូទាត់សងប្រាក់នៅកម្ពុជា ជាពិសេសប្រព័ន្ធបាគង និងបានកោតសរសើរអំពីវឌ្ឍនភាព នៃប្រព័ន្ធនេះនាពេលកន្លងមក ក្រោមគំនិតផ្តួចផ្តើម និងការដឹកនាំពីសំណាក់លោកជំទាវទេសាភិបាល។
លោក Dorji ក៏បានជម្រាបជូនថា ប្រព័ន្ធបាគង មានការទទួលស្គាល់នៅលើឆាកអន្តរជាតិ ហើយកំពុងក្លាយជាករណីគំរូមួយ សម្រាប់យកទៅសិក្សា អំពីការអភិវឌ្ឍប្រព័ន្ធទូទាត់បែបឌីជីថល នៅតាមបណ្តាធនាគារកណ្តាល និងអាជ្ញាធររូបិយវត្ថុនៃប្រទេសដទៃផ្សេងៗ។
លោក Dorji ក៏បានឆ្លៀតយកឱកាសនេះ ស្នើអញ្ជើញលោកជំទាវទេសាភិបាល ចូលរួមជាវាគ្មិនកិត្តិយស ដើម្បីចែករំលែកពីបទពិសោធន៍ នៃការអភិវឌ្ឍប្រព័ន្ធបាគង ក្នុងវេទិកានវានុវត្តន៍ប៊ូតង់ (Bhutan Innovation Forum) ដែលគ្រោងនឹងរៀបចំឡើងចាប់ពីថ្ងៃទី១ ដល់ថ្ងៃទី៣ ខែតុលា ឆ្នាំ២០២៤ ខាងមុខផងដែរ។
ជាការឆ្លើយតប លោកជំទាវទេសាភិបាល បានថ្លែងអំណរគុណដល់គណៈប្រតិភូផ្សារមូលបត្រប៊ូតង់ ដែលបានវាយតម្លៃខ្ពស់ ចំពោះសមិទ្ធផលការងារ ផ្នែកប្រព័ន្ធទូទាត់សងប្រាក់នៅកម្ពុជា និងបានស្វាគមន៍ ចំពោះការស្នើឡើងអំពីកិច្ចសហប្រតិបត្តិការនានា រួមទាំងការសិក្សាស្វែងយល់ អំពីការអភិវឌ្ឍប្រព័ន្ធបាគង។
បន្ថែមពីលើនេះ លោកជំទាវក៏បានផ្តល់ការឯកភាពជាគោលការណ៍ លើសំណើអញ្ជើញ ចូលរួមជាវាគ្មិនក្នុងវេទិកានវានុវត្តន៍ប៊ូតង់ នាពេលខាងមុខផងដែរ៕
