ដោយៈ គង់ សូរិយា
ភ្នំពេញៈ លោកជំទាវ តោ ពិឡា រដ្ឋលេខាធិការក្រសួងពាណិជ្ជកម្ម អញ្ជើញដឹកនាំកិច្ចប្រជុំស្តីពី “ការដាក់លក់គ្រាប់ស្វាយចន្ទី ដែលកែច្នៃរួចចូលទៅកាន់ផ្សារទំនើប និងម៉ាតនានា”។
កិច្ចប្រជុំកាលពីសប្តាហ៍មុននេះ លោកជំទាវ តោ ពិឡា រដ្ឋលេខាធិការក្រសួងពាណិជ្ជកម្ម បានអញ្ជើញដឹកនាំកិច្ចប្រជុំស្តីពី “ការដាក់លក់ស្វាយចន្ទី ដែលកែច្នៃរួចចូលទៅកាន់ផ្សារទំនើប និងម៉ាតនានា” ដើម្បីផ្តល់ឱកាសជូនសហគ្រាស និងក្រុមហ៊ុនផលិតគ្រាប់ស្វាយចន្ទីកម្ពុជា បានជួបផ្ទាល់ជាមួយរដ្ឋលេខាធិការដ្ឋានអាកាសចរណ៍ស៊ីវិល ជាពិសេសផ្សារទំនើប និងម៉ាត ដូចជា៖ អ៊ីអន ម៉ាក្រូ ឡាក់គី ជីបម៉ុង ថៃហួត បាយ័ន ប៊ីកស៊ី តេលា 7-Eleven និង Cambodian Superstore ជាដើម។
ក្នុងឱកាសនោះ លោកជំទាវរដ្ឋលេខាធិការ បានជម្រាបជូនអំពីគោលបំណងនៃកិច្ចពិភាក្សា ការត្រួតពិនិត្យ និងការផ្សារភ្ជាប់ទំនាក់ទំនងរវាងអ្នកផលិត និងផ្សារទំនើប ដើម្បីឈានដល់ការទទួលយក ស្វាយចន្ទីរបស់សហគ្រាស និងក្រុមហ៊ុនស្វាយចន្ទី សំដៅជំរុញការគាំទ្រ ផ្សព្វផ្សាយ ចែកចាយ និងប្រើប្រាស់ផលិតផល គ្រាប់ស្វាយចន្ទីខ្មែរ ឱ្យកាន់តែទូលំទូលាយ។
បន្ទាប់ពីពិនិត្យ និងភ្លក់រសជាតិស្វាយចន្ទីរួចមក ភាគីផ្សារទំនើប និងម៉ាត បានបង្កើតទំនាក់ទំនង និងមានចំណាប់អារម្មណ៍ចំពោះសហគ្រាស និងក្រុមហ៊ុនស្វាយចន្ទីមួយចំនួន ដើម្បីបន្តទំនាក់ទំនង និងឈានដល់ការចុះកិច្ចសន្យា ទទួលលក់ក្នុងផ្សារទំនើប និងម៉ាត នាពេលឆាប់ៗខាងមុខ៕
