ដោយៈ គង់ ម៉ាលីនណា
ភ្នំពេញៈ លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានអនុញ្ញាតឱ្យគណៈប្រតិភូនៃសមាគមពាណិជ្ជករគ្រឿងអលង្ការ និងត្បូងមានតម្លៃកម្ពុជា (CGJT) ដឹកនាំដោយលោកជំទាវញ៉ែត ស្រីអូន ដែលជាប្រធានសមាគមចូលជួបសម្តែងការគួរសម និងពិភាក្សាការងារ។
ក្នុងជំនួបកាលពីរសៀលថ្ងៃទី១១ កក្កដាកន្លងមកនេះ លោកជំទាវ ប្រធានសមាគម បានជម្រាបជូនលោកជំទាវទេសាភិបាលពីសាវតារ និងដំណើរវិវឌ្ឍន៍របស់សមាគម ដែលមានសមាជិកសរុបជាង៩០០នាក់ ព្រមទាំងបានស្នើសុំការគាំទ្រពី ធនាគារជាតិនៃកម្ពុជា ក្នុងការសម្របសម្រួលនីតិវិធីនានា ដើម្បីអាចឱ្យសមាជិក សមាគមបង្កើតគណនី សហគ្រាសជាមួយគ្រឹះស្ថានធនាគារ និងហិរញ្ញវត្ថុ ផ្លូវការបានដោយរលូនផងដែរ។
លោកជំទាវបញ្ជាក់ថា “គិតមកទល់ពេលនេះ សមាជិកសមាគមភាគច្រើន នៅបន្តប្រើប្រាស់គណនីបុគ្គល សម្រាប់ការទូទាត់នៅឡើយ”។
ជាការឆ្លើយតប លោកជំទាវទេសាភិបាល បានជម្រាបជូនគណៈប្រតិភូសមាគមថា ការប្រើប្រាស់គណនីសហគ្រាសនឹងជួយបង្កើនទំនុកចិត្ត របស់អតិថិជនកាន់តែខ្លាំងបន្ថែមទៀត លើគុណភាពទំនិញ តាមរយៈការបង្កើតភស្តុតាង កាន់តែរឹងមាំ និងតម្លាភាព ក្នុងប្រតិបត្តិការទិញ-លក់គ្រឿងអលង្ការ ឬត្បូងមានតម្លៃ។
លោកជំទាវបន្ថែមថា ការជំរុញឱ្យសហគ្រាសខ្នាតមីក្រូ តូច និងមធ្យម អាចបើកគណនីក្នុងនាមសហគ្រាស នឹងជួយឱ្យចំនួនអាជីវកម្ម ក្នុងប្រព័ន្ធផ្លូវការមានកាន់តែច្រើនឡើង ស្រ បតាមយុទ្ធសាស្រ្តរបស់រាជរដ្ឋាភិបាល ក្នុងការកៀងគរអាជីវកម្មក្រៅប្រព័ន្ធ ឱ្យចូលក្នុងប្រព័ន្ធផ្លូវការ ដើម្បីដាក់ចេញយុទ្ធសាស្រ្តអភិវឌ្ឍន៍ ប្រកបដោយប្រសិទ្ធភាព និងមានយន្តការការពារត្រឹមត្រូវដល់បុគ្គលិកក្នុងសហគ្រាស។
លោកជំទាវបណ្ឌិតបញ្ជាក់ថា ធនាគារជាតិនៃកម្ពុជានឹងយកសំណើរនេះ ទៅពិភាក្សាជាមួយក្រសួង -ស្ថាប័នពាក់ព័ន្ធដើម្បីធ្វើការសម្របសម្រួលស្របតាមនីតិវិធីនានា៕
