ដោយ: គង់ លាងហួរ
អន្តរជាតិ: យោងតាមសេចក្តីប្រកាសព័ត៌មានរបស់ការិយាល័យស្រាវជ្រាវម៉ាក្រូសេដ្ឋកិច្ចអាស៊ាន+៣ (AMRO) ចេញផ្សាយនៅថ្ងៃព្រហស្បតិ៍ ទី២៣ ខែឧសភា បានបង្ហាញថា សេដ្ឋកិច្ចកម្ពុជានឹងកើនឡើងយ៉ាងរឹងមាំនៅឆ្នាំ២០២៤ ដែលជំរុញដោយការកើនឡើងនៃការនាំចេញ និងការបន្តស្ទុះងើបឡើងវិញនៃវិស័យទេសចរណ៍។
លោក Jinho Choi សេដ្ឋវិទូជាន់ខ្ពស់របស់ស្ថាប័ន AMRO បានបញ្ជាក់នៅក្នុងសេចក្តីប្រកាសព័ត៌មានថា សេដ្ឋកិច្ចកម្ពុជាត្រូវបានព្យាករណ៍ថា នឹងកើនឡើង៥,៦% នៅឆ្នាំ២០២៤ និង៥,៩% នៅឆ្នាំ២០២៥ ដែលកើនឡើងពី៥% ក្នុងឆ្នាំ២០២៣។
លោកបានបន្ថែមថា “ការងើបឡើងវិញនៃវិស័យកាត់ដេរ កំនើនប្រកបដោយនិរន្តរភាព នៃការនាំចេញផលិតកម្មផ្សេងទៀត និងការបន្តស្ទុះងើបឡើងវិញនៃវិស័យទេសចរណ៍ នឹងគាំទ្រដល់ការងើបឡើងវិញនៃសេដ្ឋកិច្ចរបស់កម្ពុជា”។
ទោះជាយ៉ាងណាក្តី ដំណើរនៃការងើបឡើងវិញអាចរងផលប៉ះពាល់ពីហានិភ័យខាងក្រៅ និងភាពងាយរងគ្រោះក្នុងស្រុក ជាពិសេសការដាំក្បាលចុះ នៃវិស័យអចលនទ្រព្យ និងការធ្លាក់ចុះនៃគុណភាពឥណទាន។
ជាមួយគ្នានេះ លោក Hoe Ee Khor ប្រធានសេដ្ឋវិទូរបស់ការិយាល័យ AMRO បានមានប្រសាសន៍ឱ្យដឹងថា កម្ពុជាស្ថិតក្នុងចំណោមប្រទេស ដែលមានកំណើនសេដ្ឋកិច្ចលឿនបំផុត នៅក្នុងតំបន់អាស៊ាន។
លោកបានប្រាប់សារពត៌មាន Xinhua តាមរយៈសារអ៊ីមែល ថា “កំណើនក្នុងវិស័យកាត់ដេរនៅកម្ពុជា ត្រូវបានព្យាករណ៍ថា នឹងស្ទុះងើបឡើងវិញជាលំដាប់នៅឆ្នាំនេះ ដោយសារតម្រូវការដ៏រឹងមាំសម្រាប់ទំនិញប្រើប្រាស់ នៅក្នុងទីផ្សារជឿនលឿនធំៗ”។ លោកបន្ថែមថា “ដូចគ្នានេះដែរ វិស័យមិនមែនកាត់ដេរត្រូវបានព្យាករណ៍ថា នឹងរក្សាបាន នូវសន្ទុះកំណើនដ៏រឹងមាំរបស់ខ្លួន ដែលគាំទ្រដោយស្ថិរភាពនៃលំហូរវិនិយោគផ្ទាល់ពីបរទេស(FDI)”។
សេដ្ឋវិទូរូបនេះបានបន្តថា “ការស្ទុះងើបឡើងវិញនៃវិស័យទេសចរណ៍ ដែលជំរុញដោយការបង្កើនលទ្ធភាពជើងហោះហើរ និងការត្រឡប់មកវិញបន្តិចម្តងៗ នៃភ្ញៀវទេសចរណ៍បរទេស គួបផ្សំនឹងការប្រើប្រាស់ក្នុងស្រុក នឹងជំរុញឱ្យវិស័យសេវាកម្ម បង្ហាញសញ្ញាប្រសើរឡើងវិញជាបន្តបន្ទាប់”។
យ៉ាងណាមិញ លោក Hoe Ee Khor បានគូសបញ្ជាក់ថា វិស័យសំណង់អាចស្ទុះងើបឡើងវិញយឺតសន្សឹមៗ ដោយក្នុងនោះ អត្រាកំណើនមិនទាន់អាចវិលត្រឡប់ ទៅកាន់កម្រិតមុនផ្ទុះជំងឺរាតត្បាតនៅឡើយ ដោយសារការបន្តធ្លាក់ចុះនៃទីផ្សារអចលនទ្រព្យ។
លោកបន្ថែមថា “ការជំរុញការវិនិយោគហេដ្ឋារចនាសម្ព័ន្ធនឹងជួយប៉ះប៉ូវមួយផ្នែក ដល់ការដាំក្បាលចុះក្នុងវិស័យអចលនទ្រព្យ”។
ចំណែកឯ អតិផរណាសន្ទស្សន៍តម្លៃទំនិញប្រើប្រាស់ (CPI) នៅកម្ពុជាត្រូវបានព្យាករណ៍ថា នឹងស្ថិតក្នុងរង្វង់ត្រឹម២,៥ភាគរយនៅឆ្នាំ២០២៤ និង២,៦ភាគរយនៅឆ្នាំ២០២៥ខាងមុខ៕ ប្រភព: Xinhua៕
