ដោយៈ ម៉ាលីនណា
ភ្នំពេញៈ ធនាគារជាតិនៃកម្ពុជា និងក្រសួងពាណិជ្ជកម្ម កាលពីថ្ងៃទី១ ខែវិច្ឆិកា ឆ្នាំ២០២៤ បានចេញសេចក្តីជូនដំណឹងមួយ ដោយប្រាប់ឱ្យគ្រឹះស្ថានធនាគារ និងហិរញ្ញវត្ថុទាំងអស់ចូលរួមសហការសម្របសម្រួល ក្នុងការបង្កើតគណនីធនាគារជាប្រាក់រៀលជូន ដល់គ្រប់អាជីវកម្ម ដែលចុះបញ្ជីស្របច្បាប់នៅប្រទេសកម្ពុជា។
សេចក្តីជូនដំណឹងបានលើកឡើងថា ដើម្បីពង្រឹងការអនុវត្តច្បាប់ស្តីពី សហគ្រាសពាណិជ្ជកម្ម និងការលើកកម្ពស់ការប្រើប្រាស់ប្រាក់រៀល ក្នុងវិស័យធុរកិច្ច ក៏ដូចជាចូលរួមរក្សាស្ថិរភាពហិរញ្ញវត្ថុ ស្របតាមក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ និងមុំទី៥ នៃបញ្ចកោណទី៣ របស់យុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ ធនាគារជាតិនៃកម្ពុជា និងក្រសួងពាណិជ្ជកម្ម សូមស្នើឱ្យគ្រឹះស្ថានធនាគារ និងហិរញ្ញវត្ថុទាំងអស់ ចូលរួមសហការសម្របសម្រួល ក្នុងការបង្កើតគណនីធនាគារជាប្រាក់រៀល ជូនគ្រប់អាជីវកម្មដែលចុះបញ្ជីស្របច្បាប់នៅកម្ពុជា។
សេចក្តីជូនដំណឹងដដែលបានបញ្ជាក់ថា “ការប្រើប្រាស់ប្រាក់រៀលមានសារៈសំខាន់ ក្នុងការពង្រឹងប្រសិទ្ធភាពការអនុវត្តនយោបាយម៉ាក្រូសេដ្ឋកិច្ចជាតិ ជាពិសេសក្នុងការរក្សាស្ថិរភាពថ្លៃនៅក្នុងទីផ្សារ កាត់បន្ថយចំណាយប្រតិបត្តិការដុល្លារូបនីយកម្ម គាំទ្រការនាំចេញ និងការវិនិយោគ គរពូនទុនបម្រុងអន្តរជាតិ បង្កើនសុខុមាលភាពសង្គម ទទួលចំណូលពីការបោះពុម្ពក្រដាសប្រាក់ ព្រមទាំងពង្រឹងអត្តសញ្ញាណជាតិ និងអធិបតេយ្យជាតិជាដើម”។
អនុប្រធានសមាគមពាណិជ្ជកម្មកម្ពុជា-ចិន លោក ឡោ វិចិត្រ Lor Vichet, vice-president of the Cambodia Chinese Commerce Association (CCCA), បានមានប្រសាសន៍ថា បច្ចុប្បន្នចរាចរណ៍ប្រាក់ដុល្លារអាមេរិក នៅក្នុងចរន្តសេដ្ឋកិច្ចកម្ពុជាគឺមានប្រមាណ ៣/៤នៃទំហំសេដ្ឋកិច្ចទាំងមូល។
លោកបន្តថា ការប្រើប្រាស់ប្រាក់ដុល្លារច្រើន គឺវាអាចធ្វើឱ្យសេដ្ឋកិច្ចជាតិបញ្ហាច្រើន ជាពិសេសនៅពេលធនាគារកណ្តាលអាមេរិក ដំឡើងអត្រាការប្រាក់ដុល្លារ ដោយពេលនោះវានឹងទាញឱ្យអត្រាការប្រាក់កម្ចី កើនឡើង។
លោកថ្លែងថា ចំនួនប្រាក់ដុល្លារច្រើននៅក្នុងសេដ្ឋកិច្ច គឺវាធ្វើឱ្យមានសម្ពាធច្រើន ទៅលើសេដ្ឋកិច្ចជាតិកម្ពុជា ជាពិសេសនៅពេលធនាគារកណ្តាលអាមេរិក ដំឡើងអត្រាការប្រាក់ ដោយវាអាចធ្វើឱ្យថ្លៃដើម ផលិតនៅកម្ពុជាកាន់តែខ្ពស់។ ថ្លៃដើមផលិតកើនឡើង វានឹងធ្វើឱ្យសមត្ថភាពប្រកួតប្រែងជួបបញ្ហាកាន់តែច្រើន ជាពិសេសផលិតនាំចេញ ទៅលក់នៅទីផ្សារអន្តរជាតិ។
លោកឡោ វិចិត្របានបន្តថា វិធានការក្នុងការបង្កើតគណនីជាប្រាក់រៀល ឱ្យគ្រប់អាជីវកម្មស្របច្បាប់ នឹងធ្វើឱ្យវិធីសាស្រ្តក្នុងការទូទាត់ មានជម្រើសច្រើនជាងមុន ហើយក៏នឹងជួយរុញឱ្យចរន្ត នៃលំហូរប្រាក់រៀល មានកាន់តែច្រើនផងដែរ។
ទាក់ទងនឹងការវិនិយោគបរទេស អ្នកឧកញ៉ាលឹម ហេង អនុប្រធានសភាពាណិជ្ជកម្មកម្ពុជាបាននិយាយថា “ខ្ញុំគិតថា ការប្រើប្រាស់ប្រាក់រៀល គឺនឹងមិនធ្វើឱ្យបាត់បង់ផលប្រយោជន៍ ទៅដល់ក្រុមហ៊ុន ឬសហគ្រាសឡើយ៕
