ដោយៈ ម៉ាលីនណា
ភ្នំពេញៈ លោកសួន សុផល អគ្គលេខាធិការរងគណៈកម្មាធិការវិនិយោគកម្ពុជា (គ.វ.ក.) បានដឹកនាំក្រុមការងារទទួលជួបពិភាក្សាការងារ ជាមួយការិយាល័យកសិកម្មឥណ្ឌូ-ប៉ាស៊ីហ្វិក និងកសិ-ចំណីអាហារនៃប្រទេសកាណាដាតំណាងដោយ លោកស្រី Diedrah Kelly នាយិកាប្រតិបត្តិ។
ជំនួបដែលបានធ្វើឡើងកាលពីថ្ងៃទី២៨ សីហាកន្លងមកនេះធ្វើឡើង ក្នុងគោលបំណងពិភាក្សាអំពីទិដ្ឋភាពទូទៅ នៃបរិយាកាសវិនិយោគនៅកម្ពុជា និន្នាការនៃវិស័យកសិ-ចំណីអាហារ, និងកិច្ចសហប្រតិបត្តិការចំពោះមុខ។
លោកអគ្គលេខាធិការរង បានសម្តែងនូវការស្វាគមន៍យ៉ាងកក់ក្តៅជូន ចំពោះលោកស្រីនាយិកាប្រតិបត្តិ និងក្រុមការងារដែលបានអញ្ជើញ មកធ្វើទស្សនកិច្ចការងារ មកកាន់ព្រះរាជាណាចក្រកម្ពុជា ដើម្បីសិក្សាស្វែងយល់អំពីបរិយាកាស និងណែនាំខ្លួនទៅកាន់ក្រសួង ស្ថាប័នពាក់ព័ន្ធ។
ជាមួយគ្នានេះ លោកសួន សុផល បានជម្រាបជូនសមភាគីឱ្យបានជ្រាបច្បាស់ អំពីបច្ចុប្បន្នភាពថ្មីនៃបរិយាកាសវិនិយោគនៅកម្ពុជា ដែលរាជរដ្ឋាភិបាលបាន និងកំពុងខិតខំកែលម្អឱ្យកាន់តែមានភាពទាក់ទាញ និងអនុគ្រោះសម្រាប់វិនិយោគិនក្នុងស្រុក និងបរទេសដោយគ្មានការរើសអើង។
ពាក់ព័ន្ធនឹងការងារស្តីពីកសិ-ចំណីអាហារ ឯកឧត្តមបានជម្រាបជូនភាគីមិត្ត អំពីកសិផលយុទ្ធសាស្ត្ររបស់កម្ពុជា ក៏ដូចជាវត្តមាន នៃតុវិនិយោគកសិ-ចំណីអាហារ (AFID) ដែលជាតុពិគ្រោះយោបល់ មានឯកទេសលើការជំរុញ និងទាក់ទាញការវិនិយោគលើវិស័យកសិ-ចំណីអាហារ។
ជាការឆ្លើយតប លោកស្រី Diedrah Kelly នាយិកាប្រតិបត្តិបានបង្ហាញជំនឿចិត្តយ៉ាងមុតមាំថា ការិយាល័យកសិកម្មឥណ្ឌូ-ប៉ាស៊ីហ្វិក និងកសិ-ចំណីអាហារ នឹងអាចចូលរួមចំណែកសហការ ដាក់ចេញជាសកម្មភាពប្រតិបត្តិរួម ជាមួយក្រុមប្រឹក្សាអភិវឌ្ឍន៍កម្ពុជា និងAFIDនាពេលអនាគត សំដៅលើកកម្ពស់កិច្ចសហប្រតិបត្តិការទ្វេរភាគី ឱ្យកាន់តែមានផ្លែផ្កាវិជ្ជមានបន្ថែមមួយកម្រិតទៀត៕
