រដ្ឋបាលក្នុងតំបន់នៅប្រទេសចិន ត្រូវការទុនជិត ១ទ្រីលានដុល្លារ ដើម្បីទិញផ្ទះជាប់គាំងលក់មិនចេញឱ្យអស់ពីស្តុក

ដោយ: គង់ លាងហួរ
ប៉េកាំង: នៅថ្ងៃសុក្រ ទី១៧ ខែឧសភាកន្លងមកនេះ ប្រទេសចិនបានប្រកាសផែនការរបស់រដ្ឋបាលក្នុងតំបន់ ក្នុងការទិញអាផាតម៉ិនមួយចំនួន និងប្តេជ្ញាខិតខំបញ្ចប់ការសាងសង់ផ្ទះ ដែលមិនទាន់រួចរាល់ ដើម្បីប្រគល់ដល់អតិថិជនដែលបានបង់ប្រាក់រួច។

ជាក់ស្តែង អាជ្ញាធរក្នុងតំបន់នៅទីក្រុង Hangzhou បានប្រកាសថា ពួកគេនឹងទិញផ្ទះអាផាតម៉ិនចំនួន១០០.០០០ហ្វីតការ៉េ ដែលជាប់គាំងលក់មិនចេញ នៅក្នុងសង្កាត់Linan ក្នុងតម្លៃទីផ្សារ និងជួលត្រឡប់ទៅវិញក្នុងតម្លៃសមរម្យ។

ចំណែកឯ តំបន់មូលដ្ឋានផ្សេងទៀតត្រូវបានគេរំពឹងថា នឹងអនុវត្តន៍តាមចំណាត់ការនេះ បន្ទាប់ពីការិយាល័យនយោបាយនៃប្រទេសចិន បានអំពាវនាវឱ្យមានកិច្ចខិតខំប្រឹងប្រែងទូទាំងប្រទេស ដើម្បីកាត់បន្ថយចំនួនលំនៅដ្ឋាន ដែលនៅសេសសល់លក់មិនចេញ។

ជាមួយគ្នានេះក្រុមប្រឹក្សារដ្ឋចិន ក៏កំពុងពិចារណាទៅលើសំណើមួយ ដែលអនុញ្ញាតឱ្យរដ្ឋបាលក្នុងតំបន់ និងសហគ្រាសរដ្ឋ អាចប្រើប្រាស់ប្រាក់កម្ចីពីធនាគាររដ្ឋ ដើម្បីប្រមូលទិញផ្ទះដែលមិនទាន់លក់ចេញពីអ្នកអភិវឌ្ឍន៍ដែលកំពុងជួបវិបត្តិ។

យោងតាមទិន្នន័យផ្លូវការពីក្រសួងលំនៅដ្ឋាន និងអភិវឌ្ឍន៍ទីក្រុង-ជនបទបង្ហាញថា គិតត្រឹមចុងឆ្នាំ២០២៣ ចំនួនផ្ទះដែលជាប់គាំងលក់មិនចេញនៅក្នុងប្រទេសចិន មានផ្ទៃក្រឡាសរុបប្រមាណ៣,៦ពាន់លានហ្វីតការ៉េ ខណៈក្រុមអ្នកវិភាគនៅក្រុមហ៊ុន Tianfeng Securities បានប៉ាន់ប្រមាណថា រដ្ឋាភិបាលនឹងត្រូវការទុនវិនិយោគចំនួន៧ទ្រីលានយ័ន ឬស្មើជិត១ទ្រីលានដុល្លារ ដើម្បីប្រមូលទិញផ្ទះទាំងនោះឱ្យអស់ពីស្តុក។

អ្នកអភិវឌ្ឍន៍ ដែលទទួលផលគួរឱ្យកត់សម្គាល់ ពីចំណាត់ការទាំងនេះ រួមមានដូចជា ក្រុមហ៊ុន Country Garden ដែលកំពុងប្រឈមមុខនឹងម្ចាស់បំណុល ដែលទាមទារឱ្យរំលាយក្រុមហ៊ុននេះចោល ក៏ដូចជាក្រុមហ៊ុន Agile Group ដែលបានខកខានទូទាត់សងមូលបត្របំណុលជាប្រាក់ដុល្លារកាលពីដើមសប្តាហ៍នេះ។

លោកឧបនាយករដ្ឋមន្ត្រីចិន He Lifeng បានថ្លែងប្រាប់កិច្ចប្រជុំតាមអ៊ីនធឺណិតជាមួយអាជ្ញាធរផ្សេងទៀតថា រដ្ឋបាលក្នុងតំបន់អាចទិញផ្ទះ ក្នុងតម្លៃសមហេតុផល ហើយផ្ទះទាំងនោះ នឹងត្រូវបានប្រែក្លាយជាលំនៅដ្ឋានដែលមានតម្លៃសមរម្យ។

លោក He Lifeng ក៏បានបញ្ជាក់ផងដែរថា រដ្ឋបាលក្នុងតំបន់ ដែលបច្ចុប្បន្ន កំពុងជាប់ផុងក្នុងបំណុល ប្រហែល៩ទ្រីលានដុល្លារ អាចទិញដី ដែលបានលក់ទៅឱ្យអ្នកអភិវឌ្ឍន៍ត្រឡប់មកវិញ ហើយអាជ្ញាធរនឹងខិតខំតស៊ូ ដើម្បីបញ្ចប់គម្រោងដែលជាប់គាំង។

ដោយឡែក ធនាគារកណ្តាលនៃប្រទេសចិន(PBOC)បានប្រកាសថា ខ្លួននឹងកាត់បន្ថយអត្រាការប្រាក់លើកម្ចី ទិញផ្ទះបន្ថែមទៀត និងបន្ធូរបន្ថយតម្រូវការទូទាត់បង់ប្រាក់កក់មុន៕

ប្រភព: Reuters៕