ដោយៈ គង់ សូរិយា
ភ្នំពេញៈ ក្រសួងបរិស្ថាន បានប្រកាសពីការដាក់ពាក្យចូលរួមដេញថ្លៃជាសាធារណៈ នូវការប្រមូលផល អនុផលព្រៃឈើប៉ាន់ស្មាន ដែលអាចប្រមូលបាន ក្នុងអាងស្តុកទឹក នៃគម្រោងវារីអគ្គិសនីស្ទឹងតាតៃលើ ក្នុងខេត្តកោះកុង ដែលមានតម្លៃជាមូលដ្ឋានជាង១,៤លានដុល្លារអាមេរិក។
គណៈកម្មការដេញថ្លៃប្រមូលផល អនុផលព្រៃឈើ ក្នុងការសម្អាតអាងស្តុកទឹក នៃគម្រោងវារីអគ្គិសនីស្ទឹង តាតៃលើបាន ជូនដំណឹងដល់សាធារណជនថា គណៈកម្មការ នឹងធ្វើការដាក់ដេញថ្លៃជាសាធារណៈ នូវផលអនុផលព្រៃឈើ បានវាយតម្លៃប៉ាន់ស្មានធនធានព្រៃឈើ ដែលអាចប្រមូល ដើម្បីបង់ថ្លៃសួយសារ និងបុព្វលាភ ចូលថវិកាជាតិ នៃគម្រោងវារីអគ្គិសនីស្ទឹងតាតែលើ។
សេចក្តីជូនដំណឹង ដែលក្រសួងបរិស្ថាន បានបង្ហោះនាថ្ងៃទី៧ ខែវិច្ឆិកាបានឱ្យដឹងថា បរិមាណឈើឈរចម្រុះសរុបមានជាង៧,២១៤ម៉ែត្រគុប ដែលមានតម្លៃជាមូលដ្ឋាន៤៤៥,១៤២ដុល្លារអាមេរិក។
ក្រៅពីនោះ កូនឈើចម្រុះចំនួន១៦,៨០៥ដើម និងអុសសរុបចំនួន៨,៦៨៨ស្ទែរ ដែលមានតម្លៃជាមូលដ្ឋានជាង៣ ៩៧៣លានរៀល។
សេចក្តីជូនដំណឹងបញ្ជាក់ថា #រូបវ័ន្តបុគ្គល និងនីតិបុគ្គល អាចចូលរួមដេញថ្លៃបាន ដោយត្រូវបំពេញសំណុំបែបបទ និងលក្ខខណ្ឌដូចមានចែង ក្នុងសៀវភៅបន្ទុកដេញថ្លៃ និងករណីអ្នកមានប្រវត្តិ ប្រព្រឹត្តបទល្មើសព្រៃឈើ និងជាប់ជំពាក់បំណុលរដ្ឋ មិនអនុញ្ញាតឱ្យចូលរួមដេញថ្លៃទេ”។
ទីកន្លែងស្នើសុំ និងដាក់ពាក្យចូលរួមដេញថ្លៃ ធ្វើឡើងនៅ នាយកដ្ឋានរដ្ឋបាល ផែនការ និងហិរញ្ញវត្ថុ នៃអគ្គនាយកដ្ឋានតំបន់ ការពារធម្មជាតិ នៃក្រសួងបរិស្ថាន ស្ថិតនៅដីឡូលេខ៥០៣ ផ្លូវកៅស៊ូអមមាត់ទន្លេសាប ខណ្ឌ ចំការមន រាជធានីភ្នំពេញ។
ការស្នើសុំពាក្យ គឺចាប់ពីថ្ងៃទី៦ ខែវិច្ឆិកា ឆ្នាំ២០២៤ ដល់ថ្ងៃទី៥ ខែធ្នូ ឆ្នាំ២០២៤នៅរៀងរាល់ថ្ងៃធ្វើការ ហើយ ដំណើរការដេញថ្លៃ នឹងប្រព្រឹត្តទៅនៅថ្ងៃទី៦ ខែធ្នូ ឆ្នាំ២០២៤ នៅវេលាម៉ោង ៩:០០ព្រឹក នៅអគ្គនាយកដ្ឋានតំបន់ការពារធម្មជាតិ។
សេចក្តីជូនដំណឹងបានបញ្ជាក់ថា អង្គភាពប្រឆាំងអំពើពុករលួយ និងសមត្ថកិច្ចពាក់ព័ន្ធផ្សេងទៀត អាចចូលរួមសង្កេតការណ៍គ្រប់ដំណាក់កាលដេញថ្លៃឈើនេះ។
សម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជាបានធ្វើអធិបតីក្នុងពិធីបិទស្ទឹង និងបើកការដ្ឋានសាងសង់ទំនប់វារីអគ្គិសនីស្ទឹងតាតៃលើ កាលពីខែវិច្ឆិកា ឆ្នាំ២០២៣។
ទំនប់វារីអគ្គិសនីនេះ មានអានុភាព១៥០មេហ្គាវ៉ាត់ ដែលវិនិយោគសាងសង់ដោយ ក្រុមហ៊ុន Cambodian Upper Tatay Hydropower Co., Ltd.របស់ប្រទេសចិន ក្នុងតម្លៃជិត៤០០លានដុល្លារ។
គម្រោងវារីអគ្គិសនីនេះ ប្រើប្រភពទឹករបស់ស្ទឹង២ គឺស្ទឹងកែប និងស្ទឹងតាតៃ ដោយសាងសង់ទំនប់២ កាត់ស្ទឹងទាំង២ បង្កើតជាអាងស្តុកទឹក២ ភ្ជាប់គ្នាទៅវិញទៅមក ដោយទួណែលបង្ហូរទឹកក្រោមដី៕
