ដោយ: គង់ លាងហួរ
អន្តរជាតិ: ទីផ្សារជួលការិយាល័យ នៅទីក្រុងហុងកុងកំពុងស្ថិតក្នុងស្ថានភាពគួរឲ្យព្រួយបារម្ភ ខណៈចំនួនជិត១ភាគ៥នៃអគារការិយាល័យ នៅទូទាំងទីក្រុងសុទ្ធតែស្ថិតនៅទំនេរ ហើយតម្លៃជួលបានធ្លាក់ចុះ ដល់កម្រិតទាបបំផុតមិនធ្លាប់មានចាប់តាំងពីក្នុងឆ្នាំ២០១៥។
អ្នកអភិវឌ្ឍន៍អគារការិយាល័យធំៗ ក្នុងទីក្រុងរួមមានក្រុមហ៊ុន Sun Hung Kai Properties ក្រុមហ៊ុន Hongkong Land និងក្រុមហ៊ុន SEA Holdings បានផ្គត់ផ្គង់ការិយាល័យលើសតម្រូវការ ខណៈអាជីវកម្មនានា មិនទាន់ស្ទុះងើបឡើងវិញ លឿននៅឡើយ។
ក្រុមហ៊ុនប្រឹក្សាអចលនទ្រព្យ CBRE បានប៉ាន់ប្រមាណថា ក្រុមហ៊ុនទាំង៣ខាងលើ និងដៃគូ គ្រោងផ្គត់ផ្គង់ទំហំការិយាល័យថ្មី បន្ថែមប្រហែល៣លានហ្វីតការ៉េ (២៧៨.៧០៩ម៉ែត្រការ៉េ) ចូលទៅកាន់ទីផ្សារនៅឆ្នាំក្រោយ។
ការណ៍នេះត្រូវបានគេរំពឹងថា នឹងធ្វើឱ្យស្ថានភាពនៃការផ្គត់ផ្គង់ការិយាល័យលើសតម្រូវការ វិវត្តន៍កាន់តែអាក្រក់ឡើង ខណៈអត្រាការិយាល័យទំនេរ នៅទូទាំងទីក្រុងនាពេលបច្ចុប្បន្ន បានកើនឡើងដល់កម្រិតខ្ពស់បំផុតចំនួន១៧ភាគរយ។
លោក Marcos Chan ប្រធានទទួលបន្ទុកផ្នែកស្រាវជ្រាវនៅក្រុមហ៊ុនប្រឹក្សាអចលនទ្រព្យ CBRE ប្រចាំទីក្រុងហុងកុងបានលើកឡើងថា ការផ្គត់ផ្គង់លើសតម្រូវការ នឹងធ្វើឱ្យទីផ្សារការិយាល័យ នៅតែជាទីផ្សាររបស់អ្នកជួល នៅឆ្នាំ២០២៥ខាងមុខ។
លោក Marcos Chan បានធ្វើការព្យាករណ៍ថា “ការផ្គត់ផ្គង់ថ្មីនឹងធ្វើឱ្យអត្រាការិយាល័យទំនេរ កើនឡើងកាន់តែខ្ពស់នៅដំណាច់ចុងឆ្នាំ២០២៥។ ចំណែកតម្លៃជួលត្រូវបានគេរំពឹងថា នឹងធ្លាក់ចុះ ប្រហែល៥ភាគរយទៀតនៅឆ្នាំក្រោយ”៕ ប្រភព: SCMP៕
