ដោយ: គង់ លាងហួរ
អន្តរជាតិ: ទំហំនៃការនាំចូល និងការនាំចេញទំនិញឆ្លងកាត់កំពង់ផែ Zhuhai តាមរយៈស្ពានតភ្ជាប់ រវាងទីក្រុងហុងកុង ទីក្រុងជូហៃ និងទីក្រុងម៉ាកាវ បានកើនឡើងលើសពីទំហំទឹកប្រាក់៩០០ពាន់លានយ័ន (ប្រហែល១២៦,៣ពាន់លានដុល្លារអាមេរិក)។
មជ្ឈមណ្ឌលដឹកជញ្ជូនដ៏ធំមួយនេះ កំពុងក្លាយជាច្រកទ្វារពាណិជ្ជកម្មដ៏សំខាន់ សម្រាប់តំបន់សេដ្ឋកិច្ចពិសេសក្វាងទុង-ហុងកុង-ម៉ាកាវ ឬហៅថា “Greater Bay Area”។នេះបើយោងតាមការលើកឡើងរបស់ទីភ្នាក់ងារគយចិន។
ការដោះដូរពាណិជ្ជកម្មសរុប គិតចាប់ពីការបើកដំណើរការកំពង់ផែ ក្នុងខែតុលា ឆ្នាំ២០១៨ ដល់ខែកក្កដា ឆ្នាំ២០២៤ បានកើនឡើង ដល់ទំហំទឹកប្រាក់៩០១,១៩ពាន់លានយ័ន ដោយកំពង់ផែ Zhuhai បានដឹកជញ្ជូន និងទទួលទំនិញទៅ និងមកពីបណ្តាខេត្ត ក្រុង និងតំបន់ស្វយ័តចំនួន៣១នៅចិនដីគោក។
យោងតាមស្ថិតិគយបង្ហាញថា កំពង់ផែZhuhai បានចំណាយពេល២ឆ្នាំ ដើម្បីសម្រេចបាន នូវទំហំពាណិជ្ជកម្ម១០០ពាន់លានយ័នជាលើកដំបូង ហើយរយៈពេល៧ខែក្រោយមកទៀត ទំហំនេះ បានកើនឡើងដល់២០០ពាន់លានយ័ន។ ចំណែក នាពេលថ្មីៗចុងក្រោយ កំពង់ផែ Zhuhai បានចំណាយពេល៥ខែប៉ុណ្ណោះ ក្នុងការសម្រេចបានទំហំ ពាណិជ្ជកម្ម១០០ពាន់លានយ័ន។
ស្ពានតភ្ជាប់រវាងទីក្រុងហុងកុង ជូហៃ និងម៉ាកាវបានក្លាយជាច្រកដ៏លឿន សម្រាប់ការនាំចូល និងការនាំចេញទំនិញមានតម្លៃខ្ពស់ ពន្លឿនការនាំចេញផលិតផលស្រស់ ពីចិនដីគោកទៅកាន់ទីក្រុងហុងកុង និងទីក្រុងម៉ាកាវ និងជំរុញពាណិជ្ជកម្មអេឡិចត្រូនិកឆ្លងព្រំដែន។
តំបន់នេះ ក៏បានក្លាយជាមជ្ឈមណ្ឌលដឹកជញ្ជូនដ៏ធំ ក្នុងការជំរុញឱ្យមានសមាហរណកម្ម និងការអភិវឌ្ឍន៍យ៉ាងឆាប់រហ័សលើការដឹកជញ្ជូន និងសម្រួលលំហូរមូលធន និងលំហូរព័ត៌មានរវាងតំបន់ចិនដីគោក ទីក្រុងហុងកុង និងទីក្រុងម៉ាកាវ។នេះបើយោងតាមភ្នាក់ងារគយចិន៕ប្រភព: China Daily៕
