ដោយ: គង់ លាងហួរ
អន្តរជាតិ: ក្រុមហ៊ុនអភិវឌ្ឍន៍អចលនទ្រព្យខ្នាតយក្ស Hotel Properties Limited របស់មហាសេដ្ឋីសិង្ហបុរី លោក Ong Beng Seng បានបើករមណីយដ្ឋានប្រណីតមួយ នៅលើកោះ Tioman របស់ប្រទេសម៉ាឡេស៊ី។
រមណីយដ្ឋានថ្មីនេះ ត្រូវបានប្រសិទ្ធិនាមហៅថា “Boathouse Pulau Tioman”ដែលមានផ្ទះលំហែចំនួន៣១យូនីត និងមានទីតាំងនៅឆ្នេរភាគនិរតី នៃកោះ Tioman នៅទីក្រុង Kampung Nipah ហើយអ្នកដំណើរត្រូវចំណាយពេលជិះទូកប្រហែល១០នាទី ពីភូមិ Kampung Genting។
តម្លៃបន្ទប់ស្នាក់នៅមានតម្លៃ ចាប់ពី១.២០០រីងហ្គីត (ប្រហែល២៥៥ដុល្លារ) ក្នុងមួយយប់ ហើយរមណីយដ្ឋាននេះកំណត់គោលដៅភ្ញៀវទេសចរណ៍ មកពីប្រទេសសិង្ហបុរី តំបន់អឺរ៉ុប តំបន់អាស៊ីខាងជើង និងប្រទេសឥណ្ឌា។នេះបើយោងតាមសារពត៌មាន The Strait Times។
គិតមកទល់ពេលនេះ រមណីយដ្ឋានខាងលើ ជារមណីយដ្ឋានប្រណីតទី៣ នៅលើកោះTioman ខណៈរមណីយដ្ឋានចំនួន២ផ្សេងទៀត រួមមាន រមណីយដ្ឋាន Berjaya Tioman លំដាប់ផ្កាយ៤ របស់មហាសេដ្ឋីម៉ាឡេស៊ី លោក Vincent Tan និងរមណីយដ្ឋាន Japamala Tioman។
បច្ចុប្បន្ន កោះ Tioman មានចំនួនមនុស្សរស់នៅតិច និងត្រូវបានហ៊ុំព័ទ្ធដោយថ្មប៉ប្រះទឹក និងផ្កាថ្មជាច្រើនប្រភេទ ដែលធ្វើឱ្យកោះមួយនេះ ក្លាយជាគោលដៅដ៏ពេញនិយម សម្រាប់វិស័យទេសចរណ៍បាតសមុទ្រ ការជ្រមុជទឹក និងការជិះក្តារលើទឹករលក។
លោកមហាសេដ្ឋី Ong Beng Seng គឺជាពាណិជ្ជករជនជាតិម៉ាឡេស៊ី ដែលបានផ្លាស់ទីលំនៅ ទៅកាន់ប្រទេសសិង្ហបុរី។ លោកគឺជាម្ចាស់ម៉ាកយីហោសណ្ឋាគារ ម៉ូដ និងរបៀបរស់នៅល្បីៗជាច្រើនរាប់មិនអស់។
យោងតាមបញ្ជីរបស់ទស្សនាវដ្តី Forbes បង្ហាញថា លោក Ong Beng Seng បានជាប់ចំណាត់ថ្នាក់ទី២៦ ក្នុងបញ្ជីមហាសេដ្ឋីមានជាងគេបំផុតទាំង៥០រូប នៅក្នុងប្រទេសសិង្ហបុរីកាលពីឆ្នាំមុន ខណៈលោកមានទ្រព្យសម្បត្តិ សុទ្ធចំនួន១,៧ពាន់លានដុល្លារអាមេរិក៕ប្រភព: Vnexpress៕
